آه قلبي كان زعلان
كل لما يدق لما يفتكرك
يلاقي قسوة وهجرمنك
كل ما أقوله على حبك
يقنعني بقسوة قلبك
أقوله ده مفيش غيره حبيبنا
يقولي طب هو ليه سايبنا
ادور على عذر هنا وهنا ليك
أتكسف من قلبي وأداري عليك
طب لغاية امتى هضحك عليه
ولغاية امتى انت هتحس بيه
بتقوله بحبك ليه وانت بعيد
نفسه يسمعها مرة بين ايديك
عاوز هو كمان يوريك
دقاته لما بيبص في عنيك
ولما رجعتله بعد غيبة
كان من حقه يقسى عليك
ضحك وقالك انه نسيك
كداب في أصل وشه
ده هيموت ويحضن عنيك
ولما واجهته بحبه ليك
قالي اعمل ايه .. حنيت
سمعت صوته من اول مرة
دقاتي راحت طالعة لبرة
حاولت اداريها عنه بسرعة
ملقتش طريقة غير الفرقة
تفتكري صدق كدبي ولا؟
ياترى حبه ضعيف ولا أقوى
معرفتش أرد ساعتها عليه
معرفتش أقوله ايه ولا ايه
ها ياحبيبي ... قلت ايه؟
ليست هناك تعليقات:
إرسال تعليق